Në kuadër të mbledhjes së fondeve për fushatën elektorale në Shtetet e Bashkuara, që është duke hyrë në pjesën më të nxehtë të saj, reperi Jay-Z dhe bashkëshortja e tij, Beyonce, organizuan një ngjarje rasti për presidentin Obama.Mes donatorëve dhe mbështetësve të presidentit Obama ishin këngëtarë dhe aktorë me famë botërore, që “pranuan” të paguajnë 40 mijë dollarë për një gotë shampanjë. Në festë nuk munguan batutat. Në fjalën e tij, Obama foli për të përbashkëtat mes tij dhe reperit të famshëm.
“Jay-Z e di se si është jeta ime. Që të dy kemi vajza dhe që të dy i kemi bashkëshortet më me popullaritet sesa vetja. Prandaj, është pak e vështirë për t’u kapërdirë, por s’prish punë”, tha Obama.
Më tej, numri 1 i Shtëpisë së Bardhë dhe kandidati i demokratëve për një tjetër mandat përballë republikanit Mitt Romney, falënderoi këngëtaren Beyonce që është shndërruar në udhërrëfyese për vajzat e tij.
Ndërsa vetë këngëtarja shprehu besimin tek fitorja e vizionit të Obamës në zgjedhjet e nëntorit.
“S’mund të shpreh dot se sa krenarë jemi për organizimin e kësaj ngjarje sot. Ne besojmë tek vizioni i presidentit Obama”, tha ajo.
